Ka Jinglaitluid ka dei kaba baroh u briew shynrang ne kynthei, u samla ne u rangbah, ki kwah ia ka. U briew shimet u kwah ia ka jinglaitluid, ki ri ka pyrthei baroh ruh ki kwah ban ioh ia ka jinglaitluid. Haduh mynta mynne ki dang don ki jingdawa ia ka jinglaitluid, la ka long na kano kano ka kynhun, ka seng bad ki ri jong ka pyrthei.

Ka jinglaitluid ka dei kata ka jingiohlait na ka jingshah ban bein, jingshah teh shah khum, ka jingshah teh mraw, bad ka jinglait na ka jingshah pynshitom hano re hano. Ka dei ruh ka jinglait na ka jingshah synshar jong kiwei pat.  Bad lada shim ha ka jingmut kaba kham jylliew shaphang ka jinglaitluid hi ka dei ka jingkwah ban ioh ia la ka hok, bad lada u briew um ioh ia ka, u sngew ba um long uba laitluid.

Ha kine ki sngi, don kiba wad ia ka jinglaitluid na ka jingsynshar jong kiwei pat ki ri,bad ha ka jingwad ia ka jinglaitluid ka don ka jingjaw snam., Kiwei ki wad ia ka jinglaitluid na ki saiteh saikhum ka imlang sahlang. Kiwei pat ki wad ia ka jinglaitluid na ka jingsynshar jong ki kmie ki kpa ha la iing, ki khynnah skul ruh ki kwah ka jinglaitluid na ki nonghikai bad kumta ter ter.Don pat kiba wad ia ka jinglaitluid tang ban shu ioh pynhun ia la ka mon bad ka jingsngewthuh. Ia kane ngi iohi ha u Khunsarong awria uba wad ia ka jinglaitluid namar u la thait ia ka Discipline u kpa ha la iing.

U briew shimet, ki kynhun ne ki ri, ynda haba ki la ioh mad ia ka jinglaitluid hadien ka jingshah teh mraw, ki iohlad ban im ha la ka jong ka mon kaba laitluid. Ka jinglaitluid kaba khraw eh ka dei kata ka jinglaitluid na ka jingshah teh mraw ha ka pop bad u Soitan.

Ban sngewthuh ia ka jinglaitluid, ngi la dei ruh ban leit iakynduh ia u Sakhaios uba kiew halor u dieng dymbur ban iohi ia u Jisu, u briew uba lyngkot, u ba bam klop ia ka jong kiwei, uba shah teh shahkhum ha ka jingbam sap, ha ka pop kaba snoh rynjain ha ka jingim jong u, hynrei ka khyllipmat kaba u Jisu u kren ha u, ban hiar na u dieng bymbur, u sngewthuh janai ia ka jinglaitluid ha ka mynsiem.

U Dakaid halor jong ka diengphna, uba la dei ban leit sha ka jingiap bymjukut namar ki kam runar kiba u la leh ha ka pyrthei, u sngewthuh bha ia ka dor jong ka jinglaitluid kaba shisha, kaba u Jisu ong ia u , “Ha kane ka sngi men long lem bad nga ha Paradise”. Kine baroh ki shakri jong u Blei, ki long ka nongmuna na ka bynta jong ngi, haba ki ong ‘ka jinglaitluid u Khrist ka pynim ia ngi’.

Ngim artatien ban ong ba don napdeng jong ngi ruh kiba shah teh shah khum ha bynta kiba pher bapher jong ka jingim- don napdeng jong ngi kiba shahteh shakhum ha ka pop, kiba pyrshang ban ksaid hynrei kim lah, don kiba shah teh mraw ha ka jingpang kaba laban jur ia ngi ha kaba ki lad jingsumarkim lah ban pynkhiah, don kiba shah teh sha khum ha ki jingdih ba pynbuaid, kiba la bamkruin ia ka jingim u briew(samla ne rangbah) bad ka shongsuk shong shngain ha ka imlang sahlang. Don ruh kiba shahteh maraw ha ka jingngeit biej. Ngi im ha ki sngi ha kaba jyllei ki jinghikai ba pynbakla, kiba la teh la khum ia khun jong ka Balang. Don ki parabangeit kiba la iehnoh ia ki jingpule, don pat kiba iehnoh ia la ka kam kaba ki trei, namar ki pdiang ia kine jinghikai, kiba ong ba ka pyrthei ka la jan wai, ym myntoi shuh ban pule ne ban dang trei. Don ki jinghikai kiba pynsngewthuh bakla ia ka sngi ka jong u Trai, don ki jinghikai kiba pynlong ia ki khun ka Balang ban shim sting noh ia ka Bor jong ka ktien U Blei.

 Wat ha ka jingshah teh mraw u briew, u Blei u thaw ki lad ban pyllait ia u briew. Dei da ka jingieit ba maian Blei jong u, u thaw lad ban pynlaitluid ia ngi na ka jingiap jong ka pop da kaba u kiew halor jong ka diengphna ban shah iap ia ka jingiap kaba shyrkhei. Ba dei da ka snam jong u, la thied ia ngi khnang pyllaitluid ia ngi na ka jingiap jong ka pop, haba ngi ngeit bad pdiang ia U Jisu ha ka dohnud jong ngi. Kaba u Paul u ong “Ia ka jinglaitluid u Khrist u la pyllait ia ngi”.

U Jisu u long u Pyllaitbakhraw , u long u doctor uba stad uba lah ban shna ia ka jingpang ha ka met bad ka mynsiem jong ngi, U long ka jingshai jong ka jingkah dum ki jingmut jingpyrkhat jong ngi.

Ka Kamram U Khristan uba la ioh ia ka jinglaitluid;  Haba ngi la ioh ka jinglaitluid, kam kut tang kumta, hynrei ngi don ka kamram kaba ngi dei ban pyndep.

Ka snem 1841 ka dei ka snem kaba kyrpang eh na ka bynta ka Ri khasi baieit jong ngi, khamtam ia ka Balang Presbyterian, namar dei ha une u snem ka Gospel ka la poi ha ka Ri Khasi jong ngi, bad ngi la ioh ia kane ka khubor jong ka jingieit U Blei.

Ka jingwanpoi ka Gospel ka la weng ia ka jingsheptieng napdeng ki briew, ka pynioh pat ia ka jingkyrmen. U briew u long uba la duh jingkyrmen, hynrei dei ka Gospel U Jisu kaba la pyllait ia u briew na ka jingkhum jong ka pop,

Ngi la dei ban shadkmen namar kane ka Gospel kaba la wanpoi ha ka ri jong ngi, namar ngi la ioh kat kane ka jingai ka bymlah ong shuh. Hynrei ngim dei ruh ban sahkut hangta tang ha ka jingkmen, ngi la dei ban ainguh kyrpang ia U Blei namar ka Gospel kaba la wan long ka jingshai jong ka jingim ia ngi.

Ka jingsngewnguh ka long kaba donkam eh ia ngi, ha ka jingiadei bad kita kiba pyllait ia ngi, Ka jingsngewnguh ka pynlong ia khristan ym tang u nongiohi ia ka kam, hynrei u nongkyrshan ia ka.

U Paul u khot ia ki khristan ha ka Galatia, u khot ruh ia ngi ha ki por kiba mynta u da ong “Namarkata la khot ia phi ko parabangeit sha ka jinglaitluid tang ba phin ym pyntrei ia kata ka jinglaitluid jong phi ia ka ban ai daw ia ka doh hynrei da ka jingiaieit phin shakri paralok hi.(Gal 5:13)

U Paul uba la shem ia une u Khrist, u la ioh mad shisha ia kane ka jinglaitluid haduh ba u ong, “To long ka jingnguh ia u Blei namar ka jingai jongu ka bymlah ong shuh”.

Ka jinglaitluid ha u Khrist kam mut ba ngim don shuh ka mon ha la jong- hynrei ka mut ka jingpyndem lut ia la ka jingim bad ia la ka longrynieng sha ka mon u khrist. Kumta ka jinglaitluid ka pyrta” ka mon jong me tang kata nga kwah ban leh”

U briew uba la iohmad ia kane ka jinglaitluid um don shuh kano kano kawei pat ha ka jingim jong u lait noh tang ka jingnguh u ai sha u Blei.Un kynud sngewbang ia kane ka jingrwai kaba ong

Trai Kynrad ngan shakri ia me katba jingim ka dang sah

Kano kano kaba me ong te nga kloi ban leh ngam kyrngah

Kyrteng jong Me ban ialap nga sngewbha eh.

Ka jinglaitmraw ne jinglaitluid kam mut ba u briew u shongsuk ha Seion, hynrei u don ka jingkitkhlieh na ka bynta kiwei pat-. kaba U Blei u la shanniah bad aiti ha ngi. “Ban sha ka pyrthei bad ialap ia ka Gospel ha ki bynriew baroh”.

Ka jingialap ia ka Gospel ka dei ka kam kaba ha khlieh duh (Top priority ) jong ka Balang. Ka long ruh ka kam kaba neh. U John Wesley u ong, “Ka jingialap ia ka Gospel sha ka pyrthei baroh ka long ka kam kaba kongsan jong ka Balang. Da ki million ki mynsiem ki bym pat ioh sngew ia ka gospel hooid da ki phew million.

U Paul u briew uba la ioh mad ka jinglaitluid kaba shisha u shim ha lade ia ka jingkitkhlieh u da ong, “Ah kordit ia nga, lada ngam ialap iaka Gospel”. Dei kane ka jingsngewkitkhlieh bad sngewkhia ia ka kam kaba la pynlong ia u Paul ban trei dep ia kane ka kam haduh ki sngi ka jingiap jong u.

 Dei kane ka juh ka jingkitkhlieh ia ka kam kaba la pynlong ia ka Balang kmie na Ri Wales ban wan jam sha kane ka Ri jong ngi- ki la wan rah lem ia u Symbai ka Gospel ban ialap hapdeng jong ngi- ki la shah ia ka jingeh bad jingtynjuh pynban ki tur ia ki rai-eh rai-dam ban jop ia ka mynsiem jong ki briew da ka Gospel u Khrist.

Ngim lah ban len ia ka jingshisha ba ka Gospel ka la pur sha baroh ki jaka jong kane ka ri jong ngi da ka jingdon jong ka Balang bad da ka jingbteng jong ka, ia ka kam.

Kum kiba la siewspah bad kaba la ioh ia ka jinglaitluid kaba shisha na shapoh ka mynsiem ngi la dei ruh ban khmied sha jngai kham sha jngai ha kaba kyrshan ia ka Kam Mission.Ngim dei ban shu sngewhun tang ba la ioh jingpynim ialade, khlem da leh ei ei, ne ngi la dei ban pyrkhat thymmai ban trei ia kane ka kam. U Blei um shym la mon ba wat kawei ruh ka mynsiem kan jot noh.

Ngi kynmaw ba U Trai Jisu u rung sha kane ka pyrthei ba la sniew bad la pyut- um shym pynkyrpang ialade- u la pyniakhleh lang ialade bad ki nongkhrong, ki nongpop, ki kynthei bad kiwei kiwei ki briew kiba jah burom- namar u la ong “Ngam shym la wan ban khot ia kiba hok hynrei ia kiba pop ba kin kylla kaba mut”. U don ka khubor ban ai ia u riewwadburom, ia u khwan myntoi, ia uba sniew jinglong, ia uba ngeit biej hooid wat ia u nongpyniap briew.

Kane ka khot ia ki khristan ban kham pyrkhat shaphang ka pyrthei kaba u Blei u ieit. Ngi leit sha ka pyrthei namar U Blei u don hangta bad haba ngi shakri ia ki para briew ka long hi ba ngi shakri ia u Blei.